المُرسل : فواز
الرساله : للأسـف شفت البنت اللي تمنيتها .. لكن .. زوجه لأخوي
تحوّلت الشاشه قدامه سوده !! .. يقـرى المسج مره .. مرتين .. ثلاث ! .. هذي الحروف مثلها .. مو راضيه تتغيّـر .. رفع بـ بصـره تجـاه سحر .. اللي جالسه تناظره بتفحص .. يناظرها بـ حسـره .. أنتي ؟ .. أنتي اللي كان يتكلم عنج أخوي ؟ .. الكل صابه توتـر من شكله .. أعصابه تجمّـدت .. مو عارف يفكر ما يدري وش يسـوي ..
وقف من مكـانه : يـلا .. أستـأذن الحين
أم راشد : وين يمه ؟ .. توك جاي !
مشعل بدون نفس : لا خالتي بس أبوي يبيني ضروري .. نجيكم وقت ثاني ..
أم راشد : إن شاء الله .. سلّـم على الوالده
مشعل وهو يتجه ناحيه الباب : إن شاء الله يوصل
من سمعـت روح صوت الباب وهو يتسكـر .. ركضـت لهـم .. خصوصاً و إنها مستغربـه !! .. توقعـت ما يطلع من بيتهم إلا مع اذان الفجر .. أكيد صـاير شي .. طلّـت بنظرها بالمجلس تتأكد إنه مو موجود .. دخـــلت بصـراخ
روح : أيــوااا .. سحـــوور .. تعـالي ..
سحر : وين ؟
روح تناظر راشد على جنب وتطلع له لسانها بإغاظه : أسرار خاصه
قال باشمئزاز : منو قال ابي اعرفها ؟
سحر أتجهت ناحيتهـا .. مسكتها من ايدها و صعـدت معاها فوق .. وصلوا غرفه سحر .. وجلسوا على السـرير ..
روح باهتمام : ها وش صار ؟
طلعـت مريم من الخزانه : ايه وش صار ؟
عدّلت شعرها لميـاء من بعد ما كانت ورى الستاره : يلا قولي
مسكت ساره راسها بعد ما اصطدم بالطاوله اللي كانت تحتها : آآخ .. يلا نسمعج
فتحت عينها ! .. هــذول من وين طلعوا ! .. ومتى دخلوا ؟ .. و شلون ما شفتهـم !! ..
سحر : وش تســوون هنا ؟
مريم : جايين نشـوف مستقبل صديقتنا .. فيها شي ؟
سحر : شلون دخلتوا البيت !!
روح : ما عليج أنا مهربتهـم .. خلصينـا شصـار ؟
ردت بغرور : أبــد .. ما صار شي .. بس بعد يومين بسـافر .. بروح اعتمر مع حمله السحر
قالوا بصــوت واحـد : حملـــــــــه منـــــــــو ؟؟
ضحكت على شكلهم المنصدم : حمله السحر
مسكت مريم ايدها : أي حمله هذه ؟ .. ما أعرفها أنا !! .. و كيف بتسـافرين ؟ .. ومع مين !!
سحر : أحــــم .. حملـة مشعل .. أسمهــا حملة السحر .. وبنسـافر معاه ..
مريم داســت على رجلهــا : رجلي على رجلك .. ما تطلعيـن من هنــا بدونـــــــــي ..
روح : ايـــــه عيــوني .. تبيــنه يتوحد فيج ؟؟ .. لا يبه ما عندنا بنات يسـافرون مع أزواجهم بروحهم
سحر : و أنا قلت لا تجوون يعني !!
مسكـت لمياء ايدها : طيب طيب .. وش صار بعد ؟؟ .. يعني لقطـات رومانسيه كذا .. كلمتيـن حلوين
سحر : لأ
مريم : يا عمــــــي .. وش هالجفاف ؟ .. طيب ما صار شي ابـدا .. ماهو كان معاك .. ما شافك ما شفتيه .. كيف طالعك وش صار بالضبط ؟
سحر : أمممم يعني ..كح .. كنت لابسه مريول الطبخ .. و فتحت الباب .. شفتــه واقف .. و يعني هو .. يعني تقدّم شوي .. أحم .. وشفت سواد قدّامي
مريم : ليــــــــــه !!
سحر بإحراج : يعني .. أنا .. كنت .. هذا .. في .. كنت .. أحم .. يعني اندفن وجهي بـ .. هذا .. اللي هو .. مـ ملابسه
روح تصفّق : أحلــــــى يا جــــوولييــــــت
حذفت عليها علبه الكلينكس : بلا هالحركات
مريم : طيب وش كان أحسـاسك ؟
سحر : أحساسي بالموت كان يغلب أي أحسـاس .. لو واقفه أكثر كان ممكـن أبجي ! .. تخيلي مع شكلي و حالتي .. وهو واقف كاشـخ و عطـره يوصل لصمام المُخيخ ..
لميـاء : اللـــــه .. قلبي ذاب .. أوصفي لي شعورج .. تحبينه ؟
سحر : أحب منو ؟
لمياء : أبوي
سحر : لا يجيب المرض مع شواربه
لمياء : أفف .. أقصد مشعل
سحر : شفيه ؟
لمياء بقهر : تحبيــــنه ؟
لفّـت وجهها وقالت وهي تعقد حواجبها : شكــوو
لمياء : مجرد سؤال
سحر ببرود : لأ ..
مريم : وشـــو لأ !! .. أجل ليه ماخذته ياحظي ؟
سحر : الرسول عليه الصلاه والسلام قال من ترضونه ديناً وخلقا فزوجوه .. و هو يعني دينه وخلقه يمشّـون حالهم .. فـ لما صليت و أرتحت وافقت .. إني موافقه هذا ابداً ما يدخله بالمحبه .. يعني عادي .. مُجرد إني معاه أستحي أكثر .. بس ..
مريم : أدري فيك أنتي .. راسك يابس .. المهـم .. خلونا نرجع لموضوع مكه .. الحين كيف على الفلوس ؟
سحر رفعت حاجب : هه لا يبـه .. هالحركات ما أبيها .. لو تلمّحون من اليوم لبكره .. بتدفعون فلوس يعني بتدفعون
روح : يا هييي أنتـي .. و أنا شلون أجي ؟ .. من وين لي فلوس !!
سحر : راشد راح يدفع عنج .. مرته على الفاضي يعني ؟
لمياء : المهم .. وسعوا لنا مكان ..
ساره : ايه بعد ما لكم شي علي .. هناك 3 أيام لازم ما نسبح !
سحر : لا عيوني .. هذا بالحج مو بالعمره تبقين 3 أيام مُحرمه و تسبحين بس تستخدمين أشياء بدون ريحه ..
ساره : حسافه جكتني
روح تكلم سحر : أبوج بيجي معانا ؟
سحر : لأ ..
روح تنهدت : فكه
مريم : الحين خلينا من أبوك .. نرجع لموضوع مشعل .. كيف راح تكلمينه ؟ .. أنتي ما عندك جوال !
سكتت شـوي و ردت : أممم .. مدري والله .. بعدين مو لازم .. راح نسـافر بعد بكره .. وش أسوي بالجوال ؟ .. راح أشـوفه كل يوم هناك !
~
{ علـى البحـــــر / 46 : 6 مسـاءً )
.. واقف بضيق .. يتأفأف .. يلعب برجله بالرمل .. يحركها بملل .. بكدر .. يحس إن الظـلام يـزيد .. ليـش رجعت ؟ .. كنت مرتـاح و أنا بعيد .. لا سحر ولا غيرها .. وش اللي رجعني لـ هالغم .. مدري شلون راح أقدر أقابلك مره ثانيه يا مشعل ..
قطع تفكيره ايد مشعل وهي تنحط على كتفه : كنت أدري إنك هنا ..
ألتفت له .. يناظره بغرابـه .. يا مشعل أنا أبي أبتعد عن المكان اللي أنت فيه .. تجي تلحقني ؟ .. ألتف عنـه .. ومشـى .. وقفّـه مشعل وهو يمسكه من ايده و يقـول بصـرامه : لما أكلمك توقف ..
فواز : آمر ..
مشعل طلّـع الجوّال و حطّـه بوجهه : مسـجك مو
فواز : ايه
رجّـع الجوال بجيبه .. : والمطلوب مني ؟
فواز ابتسم ببرود : ولا شي بما إن عادي عندك تكون زوجتك وحده كان يبيها أخوك ..
رد بعيون ضيقه : تبيني أطلقها يا فواز ؟ .. وهي وش ذنبها إنك تبيها ؟ .. وش ذنبها أخطبها يوم و بعدها أتركها والبنت صغيره ! .. بالأسـاس أنا وش ذنبي إنك تبيها !! ..
نـزّل راسه بالأرض : طيب .. اللي تشوفه .. و إنسـى إني اخوك
تنهـد مشعل بضيق وقال : عمـوماً .. مثل ماهو صعب عليك .. فهو صعب علي أرتبط بوحده .. كانت بـ بال أخوي .. [ ابتسـم بيأس ] .. و أبشـر .. تسمع خبر طلاقها بكره ..
ألتـف عنّـه .. و مشـى .. و وجهه يطـابق الأرض .. يمشي وعلى وجهه ابتسـامه .. ابتسـامه عذاب و خضوع .. وقف فواز يناظره وهو يمشي ! .. إني ما أخذها يا مشعل .. هذا يحكم عليك إنك ما تاخذها .. وقف شـوي مشعل .. مما سبب لـ فواز أستغـراب .. ألتـف مشعـل تجـاه فـواز ..
مشعل مبتسـم : تسمعـه بحلمك طبعا ..
وقف فواز مذهــول من كـلامه وطريقتــه !! .. شفيــه ؟ .. شصــار لـه .. قرّب مشعـل منـه وحط إيده على كتفه
مشعل بصرامه : لو ترجع مكان ما جيت .. يكون أحسن
فواز : تكلمني كذا يا مشعل ؟ .. انـا ؟ .. فواز ؟ .. أخوك ؟
ناظـره بعيـون حقـد و جسـد شامخ و ثابت : عنـد سحر .. أنسـى أمي و أبـوي .. مو بس أخوي .. أعذرني ماني مستعد ابدا اني أبتعد عن خطيبتي على حساب عيون اخوي اللي ناظرت اقذر بنات دنياي الاجنبيات انعجبت بسحر
صدقني لو ترجع هناك .. راح تشوف بنات يعجبونـك .. اللي عندهم الزواج بو يوم وبعدها يتطلقـون .. اما بناتنا حنـا العرب أعلى من ما تتصور ..
فواز : طيب " يالعربي " .. أ...
مشعل : و فخري باصلـي من عـــلاه فـوق راسك ينحط .. أتق شــرّي يا فواز .. تراك منت بقدي ..
~
{ بيت أم مشعـــل / 14 : 7 مســاءً )
العمّـه سعيده : بنــــــروح مكـه !! ..
العمّـه شريفه : قالوا بيروحون .. أنتي شكو ؟
سعيده تناظر شروق وهي تأشر على شريفه : أحد كلّمها هذي ؟
شروق : عماتي .. مالي خلق نجـره وهواش !!
العمّـه سعيده : طيب .. متى بنروح ؟
شروق : عمتي .. بتجيين معانا يعني !!
العمّـه سعيده : ايه شفيها .. ولا تقدرون تروحون بدوني ؟ ..
شروق : بس ...
أم مشعل : لا يا سعيده لا تخافين .. مشعل حالـف إنهم ما يمشون بدونج ..
العمّـه سعيده : فـــــديت مشعــــلي أنـــا .. صدقيني لو مو سحر ماخذته كنت تزوجته
العمّـه شريفه : أنتي كفـايه عليج حميد و بسطتيه بالقبر
العمّـه سعيده : تكلمــــــــــت اللي رجلها من وجهها فلم الرعب طلّقها .. سكتي بس سكتي
شروق : عمتي ؟ .. بالله أنتي تروحين مكه ؟ .. بتخسفينا وبترجعين !!
العمّـه سعيده : أقول أنتي الثانيه .. سكري حلقج طيب ؟ ..
العمّـه شريفه : سكري حلقج أنتي
العمّـه سعيده : أرجع و أقول أحـد كلّمها هذي !!
مع دخـول مشعل البالي تظاهرت سعيده بالبجي وهي تتعمد تعلّي صوتها .. الكل أستغرب .. شفيهـــا ؟ .. توها تتكلم .. ألتفت لها باستغراب ..
مشعل : شفيــج عمتي ؟
العمّـه سعيده بدموع مزوّره : شفتهم يا مشعل شفتهم وش يقولون لي و أنا ببيتكم
عقّـد حواجبه وقال بوجه مستنكر هالفعل بعمّته ألتفت لهم وقال بعصبيه : شفيكم عليهـــا ؟؟
فتحت شريفه عينها وقالت : والله كذابه !! .. توها ما فيها شي !! ..
~
{ غرفه سحــر / 24 : 7 مســاءً )
سحر : والله مدري وش اخذ معاي .. أخذت 3 عبايات و 3 نقابات و 3 شيلات .. بس ملابس ماني عارفه وش اخذ !!
روح : أنا للحين حاطه لي 4 بنطلونات و 3 ...
سحر : وشو بنطلونات انتي الثانيه ! .. يا عمي كملي عمرتج على خير .. ولبسي تنانيـر أريّـح بعد للحركه .. بس شوفي أنا راح اخذ 4 ملابس نوم .. مع إن يومين راح نكون بالدرب بس باخذ وحده احتيـاط .. وباخذ 10 بـدلات عاديه .. و دراعـه للميقـات .. أدوات التنظيف خذيت لي و لج .. وش بقـى بعد ؟
روح : طيب و الأكل ؟
سحر : شوف همّهـا ! .. المهم بكره بنـروح لـ معجنـات بناخذ بيتـزا .. و مدري شوفي وش تبين .. و بنمر ناخذ توت و عصـاير .. وبس ..
روح تناظر الشنطه : سحــــر ! .. ما تكفي شنطتي
سحر : يا شين التلميـح .. جيبي ملابسج الباقيه بشنطتي .. بس لا تكثريـن .. بروحج تلبسين خيـام .. الا كم وزنج خلاص وصلتي الـ 70 ؟ ..
روح بإحراج : باقي كيلوين
سحر : يا عمــــــــــــي !! .. طولج 160 و وزنج 68 !! .. رحمي حالج ! .. والله الأكل ما راح يطير
روح : أسم الله عليــج يالرشيقـــه عاد !! ..
سحـر بغرور : 58 و 166 بـــــلا فخــــــر
روح : بلا فخر وخشمـج شوي ويطيح علينا ؟
تنهـدت سحر : أشتقـــــت لمكه .. تحسيـن بالتعذيب اللي أعيشــه ؟؟ .. هذا الشهر السابع اللي أنا مفارقتها فيه !
روح : وييييه .. عبالي بتقولين السنه السابعه !
سحر : عشـان تشوفين موتـي ؟ .. لا أنا لازم 3 مرات بالسنـه [ سكّـرت عينها وقالت بهدوء ] و مـرّه حج
روح : يا عيني على الرومنسيه بس .. راح يستانس مشعل !
لفّـت عنها سحر وقالت وهي تغيّـر الموضوع : طيب خلصتي أغراضج ؟
روح بتفحص : ما أتصل عليج ؟
قالت بابتسـامه عريضه : لأ
روح وهي رافعه حاجب : وليش شاقه الحلج حضرتج ؟
سحر : لأن لو أتصل ما راح أعرف أقول كلمتين على بعـض ..
روح : أجل يارب يتـ ...
قطـعهم صـوت تلفـون غرفه سحر .. ألتفت روح لـ سحر : خخخ هذا هو
سحر باستخفاف وهي تمشي تجاه التلفون : خفيـــــفه مره ..
رفعـت التلفـون وقالت : السلام عليكم والرحمه
مشعل : وعليكم السلام ورحمه الله
أنصدمـت و أنربط لســانها .. ألتفــت تنـاظر روح بعيـون مفتـوحه وهي تأشـر على السمّـاعه .. سكتت مو عارفه شتقـول ..
مشعل : سحـر ؟
!
يتبع
منقول
الرئيسية 
التسجيل 
دخول 
السبت فبراير 16, 2008 1:50 pm