مشعل : ما شاء الله .. صـوته خاشِـع !
راشد : ايه والله .. حتى اللي قربي أشك إنه سمـع شي ! .. طول الصلاه يبجي
مشعل : ههههههه ايه ما شاء الله عليه .. [ تنهــد ] .. والله ياخوي راحه غريبـه !
راشد يبتسـم : صدقت .. تدري من متى ما صليت بمسجد ؟؟ .. يمكن أكثر من شهر !
مشعـل لف بوجهه : أبـداً ما راح أطلب منك تسألني من متى ما صليت بمسجد !
راشد : هههههههه .. لا تخاف نحترم شعورك .. الا عبد الرحمن صلّـى معاك صح ؟ ولا راح ننخسف ؟ ..
مشعل يناظر عبد الرحمن : لا ما شاء الله عليـه .. واحنا نصلي .. يتملل شوي ياخذ له فـرّه بين اللي يصلـون ويرجع .. صـلاه تامـه ما شاء الله عليـه !
عبد الرحمن يدافع : أحسـن منك !! .. كل دقيقه يفتح عينه ويسكرها .. ياخي دامك بتنام ليش جاي ؟
مشعل : أكحـل عيني بشـوفتك يالرشيـــق !
~
{ غرفة الطعام .. بيت شروق / 59 : 12 مسـاءً )
شروق : لا بس بروح بعد صلاه المغرب بيت أم راشد ..
يوسف وهو يشـرب العصيـر : عندهم عزيمه يعني ؟
شروق : لا نخطب لمشعل ..
شـرق بالعصيـر .. وبدا يكــح بقـوّه .. ضــربت على ظهـره وهي تناظر وجهه يتحـوّل لأحمـر
شروق : بسم الله عليك .. شفيك ؟؟
يوسف يحاول ياخـذ نفس .. تنهّـد وكمّـل وهو للحين مو مستوعب : مشعــــل !! .. مشعــل أخووج ؟
ضحكـت عليه : ايه أخوي .. مشعل اخوي
يوسف : طيب وش يسوي هناك ؟؟ .. يخطب عبد الرحمن ؟
شروق :ههههه لا يبه .. عندهم بنت اسمها سحر .. تقول للقمر وخر أبقعد مكانك
يوسف : والله للأسـف ما تعرفت عليها
سحبت الصحن من قدامه : خيـــــــــــر ؟؟
يوسف : ههههههه امزح معاج يبه .. رجعي الصحن ما كليت شي ..
ناظرتـه بطرف عينها وهي ترجع الصحـن : خذ
يوسف : المهـم .. أحم .. و أحنا متى نشـرفهم
فتحت عينها : تشرفونهم ليـش !!
يوسف : ههههههه لا يعني عشان نتفق مع ابوها واخوها وعمامها
شروق : مدري .. بس اليوم بروح أنا و أمي وعمتي شريفه وسعيده ونعيمه .. شي طبيعي إن ما راح نطلع الا ومقطوع وجههنا .. وانت أخبـر ! .. بس من مشعل صغير وهم حالفيـن إن هذي الليله ما تعدي الا وهم فيها .. ومشعل مو راضي نكسر بخاطرهم ..
يوسف : يسـوون لكم جو على الأقـل !
شروق : استهدي بالله أي جو أنت الثاني .. آخر مره دخلنا على عميمه شريفه شفنـا عمتي سعيده قاعده تحذفها بالنعال و أنت تقـول جو ! ..
~
{ الطابق الثالث / 17 : 1 مســاءً )
قرّب منهـا وبإيـده عصيـر .. سحـب طاوله .. وحط العصيـر قدّامـه .. بكل هدوء راح جلـس على كرسـي بعيـد .. شكلـه بريء .. كأنه خدامه راح يسفرونها ! .. ناظرتـه باستغـراب .. وكأنها تسـأله وش هذا ؟ ..
راشـد تنهـد وابتسـم : عصيـر أنا طبخته
روح : طبخت العصير ؟؟
راشد منـزّل راسه : ايه
روح مو فاهمه : ليش ؟؟
قال ومنظـره منظـر طفـل يبرر : لأن حركتي كانت سخيفه معاج بالمجمع ..
هزّت راسها بتفهّـم وكأنها تقـوله الحمد لله دريت .. رفعت الكاس .. تناظر لونه .. لا والله باين عليه مضبوط !! .. ومسوي فيها ذوق يعني جايبه بطريقه حلـوه .. وشكل الثلــج منعـش ومكثّـر منـه .. بكـل هدوء قرّبتـه من فمهـا وهي تسـمي ..
راشد وهو يناظرها باندماج : حلووو ؟
ناظرته بطرف عينها : لأ
رد عليها وهو متفشل : كـــح
قالت بغرور بعـد ما ذاقـت من الطرف : آه .. والله زيـن ماشي حاله .. بس بقـى عندنا سكـر ولا خلّصته ؟
راشد بثقه : قلت بما إنـج المره اللي فاتت خلصتـي الملح .. فـ أنا أخلّـص السكر !
روح : ههههههههه .. بصراحه .. عمري ما حبيت روحي كثر ما لما سويت العصير .. إنجــــاز !
راشد : إنجاز ؟؟ .. يومها ما قدرت أنام من ألم البطن .. بس تعرفين يعني عروس جديده ما حبينا نحسسج بالذنب
روح رفعت حاجب : ومنو قال اني راح احس بالذنب ؟
انسدح على وراه : آهــا .. نسيـت ! .. [ كمّـل وهو يناظرها ويبتسـم ويقرّب ] بس كان باين انه من ايدج
روح بعـلامه توقيف : راشـد !!
راشد برومانسيه أكثر : مثل النفس الخايسه حتى على العصير
حذفت عليه علبه الكلينكس : مـــــا يضحـــــك زيـــن
~
{ بعـد 5 سـاعات .. غرفـه سحــر / 24 : 6 مسـاءً )
لبست نعالهــا و ربطت خيوطه اللي توصل لنصف الساق .. و ناظرت نفسـها " الحين أوكي ! " ..
ضبطت كل شي .. مكيـاجها مايـل للنعومـه .. مُحدد بنـي .. مع روج لونه خفيـف .. كحـل وماسكـرا .. شـادو بلون البشـره خفيف .. وبلاشر وردي خفيف على خدينها .. رافعــه شعـرها بكليـب وخصـلاتها الاماميـه تاركتهــم يوصلون لحد رقبتهـا .. لبسـت تراكـي الحلقـات كبيـره .. مع جبنيــز ضيـق بلـون البيـج والبنـي .. وتنـوره بنيّـه لتحـت الركبه فيهـا خيـوط وسيـور .. لبسـت السـاعه من الجلـد البنـي .. وخاتـم باليد اليمنى .. تراجعـت شـوي للخلف .. جســم مرسـوم لتفصيلـه .. تراجعـت على وراها .. و ألتفـت للبـاب .. حرّكـت رجلهـا عشـان تمشـي .. لكن ! .. وقفـت مكانها .. مو قادره تحرّكها .. تنهـدت بضيـق و أضطـرت انها تجلس على الكرسي لحد ما ترتـاح ..
بعد دقـه الباب .. دخلت عليها روح وعلى وجهها علامات استفهـام .. الناس تحت وهي جاهزه وجالسـه على الكرسي !!
روح : امج ذبحتني وهي تقول لي اناديج .. و أنتي جاهزه وقاعده هنا !! .. ترى حتى أنا ما نزلت
سحر تغيّـر الموضوع : لا بس أستحي
روح : واااااي !! .. تكفيـن اللي يسمع يقـول مقطعتنا يعني .. بتنزلين .. بتكلمينهم .. بتقولين لأمج ما أبيه و أنتهت السـالفه .. كل هذا ليش ؟؟
سحر : ياختي قولي لأمي ..
روح وهي طالعه : طيب خلصينا بسرعه نزلي ..
ناظرت رجلها : 5 دقايق ان شاء الله
~
{ المجلـس / 30 : 6 مســاءً )
العمّـه شريفه : أكيد يا أم راشد .. حنا نفتخـر إن يكون لولدنا زوجه مثل بنتـج ..
العمّـه سعيده : و أنـا لي الشـرف أني العمّـه " الوحيـــــــده " لمشعل اللي جايه
قالت شـروق تلحق على الوضع قبل لا يتحول لساحه قتال : والله يا خاله ما تتصورين فرحتنا بقربكم .. ونعم ما اختار اخوي ..
أم راشد : من طيب أصلكم والله .. مشعل ولدنا .. و زين الرجاجيل .. وجيتكم عزيزه وغاليه
أخيـراً .. صوت خطوات سحـر .. دخلـت بسـلام ناعـم وهادئ .. وعلـى وجهها علامات مخلوطه بلطف .. رفعت عينهـا تناظـرهم .. !! .. انشلّـت حركتها وما قدرت تكمل .. ما تدري الخلل برجلها ولا بصدمتها !! .. معقـوله !! .. هذي ام مشعل .. وشروق معاها .. وابتسـامه شروق أكبر دليــل .. ضاعت معالمهـا .. سكـرت عينها .. وتنهـدت .. تتذكـر كل لحظه جمعتها بـ مشعل .. أول لقـاء بينهم ! .. السياره .. بيتهم .. المحل .. المستشـفى .. العرس .. كل شي !
تحرّكـت وكملت مشيهـا .. متجهه ناحيـه الكرسي المنفرد تجلس عليـه .. سحبتها يد العمه سعيـده
العمه سعيده وهي تناظر شريفه بإغاظه : تعــــااالي يمــه بسم الله عليـــج عند عمتــج حبيبـة قلبـج
ابتسمـت لها وهي بداخلها تضحك .. تهبّـل والله ! .. راحت عندها وجلسـت قربهــا ..
أم مشعل : لا اله الا الله عليج يا سحر .. كل يوم تزيدين حلاة .. الله يحفظج
غمزت لها شروق : يا حظـــــــك يا مشعـــل ويا هناك بـ سحـر
مع اسم مشعـل بلعـت ريقهـا وحاولت تتقبل تكرر أسمـه قدامهـا ..
~
{ المطعـــم / 00 : 7 مسـاءً )
راشد : أيه يمـه .
..... : ( ------ )
راشد : طيب وش صـار ؟
..... : ( ------ )
راشد بصدمه وهو ينـاظر مشعل : نعـــــــــــــم !!
..... : ( ------ )
راشد : طيب طيب .. أكلمـج بعـدين
سكر الجوال مصدوم من اللي سمعه .. سحر !! .. و مشعل ؟؟ .. سحر أختي اللي ما يعجبها أحد .. ومشعل اللي يسموونه " عانس " على قولتهم لأنه رافض فكره الزواج نهائيـاً .. مو معقـوله أبـداً .. وهو ينـاظر مشعـل اللي فهم من كلامه وبـدأ يضحــك .. من صجها أمي ؟؟ .. وليش ما قال لي .. مسكــه من قميصــه وسحبــه لعنده بقهـر مخالط لـ علامات صدمه للحين باقيه
راشد : مشعلوووو
مشعل وهو يمسك ايده : هههههه اتركني فضحتنا قدام العالم
راشد : يا شقوول .. شقوول .. تخطب من وراي .. ولا فـووق هذا أختــــــــي !!
مشعل : أحــم .. قلنا نناسبـك مع انك ما تستاهل بس مو مشكله
راشد : اصبـــر ترى للحين مو داخله مخــي الفكــره !! .. مشعل بعد 27 سنه وهو غثـه على كبدي .. الحين يتزوج ! .. وياخذ أختـي .. لكن اصبر .. خلني أشوفك أوريك .. مضطر اروح .. البيت حارقين جوالي يقولون لي اروح لهم .. راجع لك لا تخاف ..
مشعل : ههههههه سلّـم على عمي وخالتي
راشد وهو يمشي : ما يــــــوصل
راح عنّـه راشـد .. وهـو في غمـرة سعـادته .. ما يقـدر يوصفهــا .. يحـس ان الدنيـا تحبـه .. قرّب وقت لقيـاها .. سحـر ! .. أنتظــار وقت طويــل .. وعقبــات كبيــره .. أخيــرا ! .. قـام هو الثـاني يرجع البيـت .. يبي يعرف كل شي صار بالتفصيــل .. و علـى ذكـراها .. ركب سيـارته .. و راح ..
~
{ علـى طاولـة الطعـام / 28 : 7 مسـاءً )
راشد : لا يبـه مشعل ولد ما شاء الله أخـلاق ..
بو راشد : قلت لي ولد منـو ؟
راشد : العبد الله يبه ..
فتـح عينه : العبـد الله !!!
راشد : ايه
ألتفـت لـ سحر : إن ضيعتـيه من ايـدج بضيّـع ملامحج .. لا عـاد هذا ما يتفـوّت
رفعت عينهـا .. تناظره .. هذا بدل مبروك مثلا ؟ .. ولا هذا التشجيع ولا الخوف علي ! .. هذا أبو ؟ .. حسّـت نفسها بـ بقاءها أكثر تهيـن نفسها وترخصها اكثر مما رخصهـا أبوهـا .. كفـايه كرهـي لك يا يبه .. الله يخليك لا تزيده .. تركت الاكل .. وقامت .. طلعت من غرفه الطعـام إلـى المجلس .. أكـــرهك .. أكـــرهك .. ليتنـي يتيمـه ولا أنت بحيـاتي ..
ناظره راشد يستفهم مدى الطمع اللي فيه من صجه هذا ؟؟ ..
روح تتأفأف : والله حاله
رفع بو راشد نظـره وقال بنبـره قاسيه : و أنتي شكو قاطه وجهـج
عبد الرحمن بدفاع : هـــــي تعرف تبـــوس .. أحســن منك بس تـزف
راشد : يبه اذا فيـك قهـر إن سحر طنشـتك و راحت فـ ما تطلعها بزوجتي .. أوكي ؟
بو راشد : وليش بالله ؟ .. أنت من اللي زوجاتهم ماسحين شخصيتهم ؟
ابتسـم : ايه .. في مانع يبه ؟ .. وياليت يعني ما تكلّـم سحر بهذي الطريقه .. ان كانت ما تبيـه .. فـ ما أنخـــــــلق اللي يغصبهـا .. ولو وصلت لـ سن الـ 50 وما تبي تتزوج بعـد كيفهـا .. ومحد له حق يتكلــم ..
بو راشد : ومن حضـرتك عشـان تتكلم ؟
راشد : هه .. و بكـل فخـر .. أخوهـا .. أنتي تـدري بنت يتيمـه .. لو تبي شي ترجع لي .. ولو راح تاخذ واحد ما عنده فـلس واحد .. لكن هي تبيه .. أول من يشيل عرسهم هو أنــــا .. سحــر اغلــى من أنهــا تنبـاع بالفلوس
بو راشد : و أنا وين رحت ؟؟ .. مكلفينـك عني ان شاء الله
راشد : أنت وين رحت ؟ .. ما رحت مكان .. نشـوفك بالعشـا و الغـدا .. لا تخاف يبه .. مهما قلت ما راح تستفـزني وتخليني أقـوم من علـى الأكـل .. بكمّـل بكمـّل ..
ضحكت عليـه روح .. تعرفـون اللي واقف ورى بـاب مقفـول ويقـدر يقـول اللي يبيه .. هذا شعـور روح بهذيك اللحظه .. صحيـح بو راشـد طمّـاع .. وبخيـل .. لكن ما عنده لسـان يعرف يرد فيـه ! ..
تنهـدت أم راشـد بضيـق .. وقامت تشـوف سحــر .. راحت لها شـافتها قاعده وتشـوف التلفـزيون .. قرّبت منهـا .. وقالت تبرر ..
أم راشد : يا يمه أبوج ما يقصـد ..
ابتسمت : حفظت الاسطوانه يمه .. أبوي يوم من الأيـام بيقتل واحد فينا وهو ما يقصد !!
أم راشد : يا يمه لا تخلينه يخرب عليج
سحر : يخرب علي ايش ؟
أم راشد : زواجج !
سحر باستفهـام : ومنو قال إني موافقه ؟
يتبع
منقول
الرئيسية 
التسجيل 
دخول 
السبت فبراير 16, 2008 1:34 pm